ОХУ-ын Засгийн газрын тэргүүн  В.Путины урилгаар Монгол Улсын Ерөнхий сайд С.Батболд 2010 оны 12 дугаар сарын 13-16-ны өдрүүдэд ОХУ-д албан ёсоор айлчилна. Айлчлалын явцад Монгол Улсын Ерөнхий сайд С.Батболд ОХУ-ын Засгийн газрын тэргүүн В.Путинтэй яриа хэлэлцээ хийж, бусад удирдах хүмүүстэй уулзан, Монгол, Оросын стратегийн түншлэлийг хөгжүүлэх тухай хамтарсан Тунхаглалын үзэл санааны дагуу хоёр орны харилцаа, худалдаа, эдийн засаг, дэд бүтэц, хөрөнгө оруулалтын хамтын ажиллагааны талаар хэлэлцэнэ. 12-р сарын 13 нд Ерөнхий сайд С.Батболд хоёр орны бизнес эрхлэгчдийн уулзалтад оролцож, Москва хотноо ажиллаж, амьдарч, сурч байгаа нутаг нэгтнүүдтэйгээ уулзахаар төлөвлөсөн байна. Ерөнхий сайдын энэ айлчлал хоёр улсын уламжлалт найрсаг харилцааг бэхжүүлэх, итгэлцэл, ойлголцлыг нэмэгдүүлэх, Оросын удирдагчидтай тогтоосон нөхөрсөг харилцааг бататгах, стратегийн түншлэлийн харилцаа, эдийн засгийн хамтын ажиллагааг бүх талаар урагшлуулна гэдэгт Москва найдаж байна.